من غير سبب مش عارف لية عندي امل !!

زي الطيور دي الي صورتها و ثقتها بان ربنا هيرزقها من قلب

البحر دة انا عندي امل ان حجات كتير هتكون احسن

فقط هي دعوة للتفاؤل

اوهام للبيع وهرتلات وارهاصات مغترب

اليوم هحكيلكم حكاية الزلعاوي ...اة الزلعاوي اسمة كدة راجل دايما غامض الناس كلها تتكلم معاة وهو يرد بالقطارة دايما ... يراقب الناس من بعيد بس ابدا ... مكانش بيعمل زيهم الزلعاوي جاب زلع فخار وعباها تراب وركنها في المحل الي ورثة عن والدة ووالدة عن جدة وكل واحد فيهم كان لة نشاط مختلف الزلعاوي محلة وسط السوق والناس حوالية كلها بتبيع حجات مهمة جداا اكل وتمور

واواني فضة ونحاس وملابس وخضار وفاكهة ... وحتي جواري وعبيد ... مهو دة ايام زمان افهموني يا جماعة في يومكم دة الي كلة تراب في الجو

المهم في اليوم المرتقب قعد الزلعاي وقدامة زلع الفخار الي مليانة تراب والناس تروح وتجي وكل الناس مستغربة اية الراجل الاهبل دة .. ومنهم الي يضحك ومنهم الي يسخر منة ... دة حتي فية منهم كان بيحدفة بالطوب ... وهو ساكت ومن غير كلام .... ومرت الايام والزلعاوي يجي الصبح يفتح المحل ويحط الزلع المليانة تراب .... وفي اخر اليوم يدخل الزلع في المحل ويقفل ولا باع منهم ولا واحد .... لغاية ما في مرة من المرات جالة واحد ... من المستغربين دول وسئلة يا زلعاوي بتستفيد اية من الموضوع دة طيب شوفلك حاجة تتباع والناس تستفيد منها حاجة تتاكل او تتشرب

او تتلبس حتي ... رد علية الزلعاوي وقالة ... شوف عايز تشتري اشتري مش عايز امشي الراجل قالة طيب لو انا اشتريت هعمل اية بالزلع التراب دي .... الزلعاوي قالة ولا حاجة انا هجي تاني يوم واشتريها منك بضعف الثمن الراجل استغرب جداا وقال اما اجرب واشتري المهم اشتري زلعتين منة وكان تمنهم عشرة دراهم وراح البيت ونسي موضوع الزلع خالص ... تاني يوم الباب بيدق راح الخادم فتح الباب لقاة الزلعاوي وجاي ياخد الزلعتين بعشرين درهم الراجل استغرب وقال يالا وانا هعمل بيهم اية دنا كنت بس بشوف واجرب الزلعاوي دفع الفلوس واخد الزلع ... الراجل بعد ما مشي وهو بيفطر سئل نفسة دة موضوع مربح جداا انا اخد حاجة بسعر وتاني يوم تكون بضعف السعر اما اروح اكرر التجربة وراح السوق واشتري 10 زلع وتاني يوم جة الزلعاوي وبرضو دفعلوا فيهم ضعف السعر وكرر الراجل التجربة ... مرة تالتة وعلشان طبعا الاخبار مش بتستخبي اتسربت الاخبار

والناس عرفت ان الزلعاوي بيبيع الزلع دي وتاني يوم تكون بضعف التمن الكل حب يجرب وراحت الناس تشوف وتسئل وتزاحم والزلعاوي يبيع ويبيع والناس تخزن في الزلع وبعدين الناس الي في السوق كلهم شالوا بضايعهم المهمة جداا وحطوا زلع التراب واصبح السوق كلة زلع مليانة تراب وناس بتبيع وتشتري والزلعاوي يبيع ويبيع لغاية اما كل الزلع من عندة خلصت وكانت عدد هائل وجة يوم الزلعاوي مراحش السوق ياخد الزلع بضعف السعر كالعادة . بعد ما وصل سعر الزلع لاسعار جنونية وكل يوم تزيد وتزيد وهي اصلا متساويش حاجة.. وانتظرت الناس يوم يومين تلاتة وقرروا يروحوا يسئلوة فينك يا عم ... لية مش بتيجي السوق دحنا حالنا وقف رد عليهم بنفس الهدوء بتاع زمان .... انا خلاص غيرت نشاطي ومش هبيع ولا اشتري زلع .........وبكدة انتهت قصة

الزلعاوي بس هي لسة مستمرة في الواقع ياتري انا بقصد اية بالقصة دي يا جماعة ؟؟؟؟

ملحوظة مهمة جداا: الزلعاوي ساب مضارب بني شعبوكا بفيزا مضروبة وهج

لو انت عصفور بتنظر من هنا لبرة هتشوف اية

عبء الاقوات حني ظهري

نفسي اشوف ارضنا كلها كدة

دعوة لزيارة المدونة الاخري تصوير ورسم

لوحات من رسوماتي وصور من تصويري في المدونة الثانية

http://adel29.blogspot.com/

كلها دقيقة ......واضحك

ساعات الواحد بيقعد مع نفسة ويسرح

بعيد عن كل المشاكل الكثيرة الي حوالينا

كل واحد فينا يا اما عمل ازمة او اتعملت فية

بس في الأخر لو يفكروا الاتنين هيلاقوا ......

الانسان محتاج 20 سنة علشان ينضج (يبلغ اشدة)يعني

من ساعة ما كان في بطن امة وبعدين طفل وبعدين شاب

وهنا عقلة بيكون في قمة النضوج ويفكر ويفكرويفكر

هيحتاج 3 الاف سنة علشان يكتشف طريقة بناءة وخلقة

وهيفضل للأبد علشان يعرف حاجة عن نفسة .......

بس دايما بينسي ان دقيقة وحدة كافية لقتلة ........

كل يوم وكل ليلة اتغم وحتي لما بحاول اضحك مش بعرف

عالمي اصبح غريب ... امبارح شوفت لقاء ...في التلفزيون

ناس بتعمل اللبن ...للاطفال والشيوخ والحوامل والرضع

ومش لي انا علشان مش بحب اللبن ... الحمد لله

مكونات اللبن لوحدها مصيبة ... معلش مقدرتش

اركز في المقادير من الصدمة... بس فاكر الزهرة

اة بتاعة الهدوم دي وبودرة بلاط علشان التماسك يعني

وسماد اليوريا علشان خدع التحليل وزيوت نباتية

المهم شوية عك وتتعك ...تبقي لبن ودة كلام الجرايد

http://www.alwafd.org/v2/News/NewsDetail.php?id=12757&type=columns

يا ناس ارحمونا ... حرام عليكم

انا خلاص مش عارف ... اضحك...

يالا كلها دقيقة وانسي ...................

الحمار الوحشي مع مين

بصوا الليلة طالبة تمارين مش رياضية تمارين من العينة الي تهدي الواحد وتحتاج

تفكير عميق شوية

لان ساعات المخ بيركن كدة زي الساعة لما تخلص بطاريتها ...والمقلب موجود تحت

التمرين دة الي عايز يقراة

يالا كل حد يجيب ورقة وقلم رصاص واربعة الوان اخضر وذهبي وازرق واصفر

هيعجبكم التمرين دة

بجد......................خلاص ؟؟ نبتدي

==================================================

هنالك اربعة اشخاص من اربعة اقطار عربية ,,,كل منهم يسكن منزلا مختلف اللون عن

منازل الاخرين ,,,وكل منهم يدخن نوعا مختلفا من السجاير ,,,ويشرب نوعا مختلفا

من الشراب,,,ويملك حيوانا مختلفا عن الاخرين

• السوداني يملك الكلب

• القهوة تشرب في المنزل الأخضر

• المصري يشرب الشاي

• البيت الاخضر يقع مباشرة الي اليمين من البيت الذهبي اللون

• الشخص في البيت الاصفر يدخن سجاير كنت

• الكويتي يسكن في البيت الواقع علي الطرف الايسر

• مدخن سجاير فيلادلفيا يكون الجار المباشر لمالك الثعلب

• مدخن سجاير كنت يكون الجار المباشر لمالك الحصان

• الشخص الذي يدخن مارلبورو يشرب عصير البرتقال

• الشخص السعودي يدخن سجاير بيبلوس

• الكويتي يسكن في البيت المجاور للبيت الازرق

السؤال هو : من يملك الحمار الوحشي ؟؟

ومن الذي يشرب الماء ؟؟؟

هنعمل سحب للفائز طبعا

دة اسمة تمرين في التفكير المنظم وجميل جدااا

حرامية الفراخ قلالات الادب !!!!

كل ما اجي اكتب حاجة سن القلم يبوظ.... علشان كدة الخط ممكن يكون وحش

شوية...متشكر جداا من كل الناس الي علقت عندي واسف علي التأخير...المهم

بعد ما صاحبنا...زعل... وغضب... تاني يوم عزمناة علي الغدا...وظبطناة خالص

ونندهلة باسم الدلع بتاعة روح يا حمادة تعالي يا حمادة لدرجة ان الواد اتمنا يكون اتعمل فية مقلب

من زمان ...ومرت الايام وراحت الايام ...وفي قعدة صفا في البلكونة متجمعين وبنشرب شاي العصرية قال يعني عالم رومانسية ...

خدنا الكلام للمقلب بتاع زمان وعلي رأي المثل قل للزمان ارجع يا زمان وفضلنا نضحك ...هو رد علينا وقال طيب تعرفوا انا اصلا مكنتش خايف...الواد كان هيموت ويقلك مكنتش خايف . ....

انا استغربت اية الجراءة دي... قال.... ولا حد يقدر يعمل في مقالب تاني...انا بسرعة البرق

غيرت الموضوع ودخلت في حجات تاني خالص...وبعدين انا لمحت فراخ في حوش المدرسة تحت

مليش دعوة مش هقول تاني المدرسة الي في اخر الشارع ...واحنا بنطل عليها ...فضلت اتكلم عن

الاكل وطعامة الفراخ والمغامرات وغيرة...وبحركات ملتوية وكلام عن رباطة الجأش ...حلوة الجأش

دي.... اقنعت حمادة وحسن انهم ينزلوا ويلفوا من ورا ويمسكوا الفراخ دي ...وانا هنزلهم حبل طويل

يربطوا فية الفراخ ...واشدة لفوق وخلاص...طبعا الفراخ دة بتاع وحدة ست شرانية خالص ساكنة

في الدور الارضي ....والفراخ بينط في المدرسة....اقتنعوا بعد عذاب ومناورات كتير...مني ومن

تامر....لفوا ونطوا من السور وكنت شرحتلهم هيعملوا اية بالظبط ...يخلوا الفراخ تمشي الاول ناحية

الركن البعيد الي هناك دة....وبعد كدة هجوم عليهم وامسك....هما نزلوا وانا وتامر ميتين من الضحك

فوق وكل ما يزيد الضحك انزل تحت في البلكونة علشان ميشوفونيش وتستمر...القصة مسكوا تلات

فرخات ....وجايين ماسكينهم ورا ظهرهم ومكممين افواهم ....علشان الكوكوووكاكي....صوتهم

يعني ...العيال ربطت الفراخ ولسة بيشاور...محمد ........اني اطلع بالحبل .... انا اخدت قرار اني اطلع

بية شوية اعلي منة علشان ميطولش الفراخ مرة تاني.....وعينكم ما تشوف الا النور....باعلي صوت

يا حرامية الفراخ......الحقوا بيسرقوا الفراخ.....تامر يسحب الحبل بالفراخ وانا اصرخ...والعيال

تتكعبل وتوقع ...ومش عارفين يعملوا اية....مسافة لغاية السور...الست الشرانية خرجت...وشافت

باقي الفراخ تحت مزعور....وهما بيجروا... وواحد بيقول حرامية فراخ.....الست فضلت تندة

علي رجالتها.... وهما كانوا علي السور... ووقعوا من برة من كتر الرجفة.....وطبعا الناس فضلت

تدور عليهم وهما فص ملح وداب.... مقدروش يرجعوا طبعا علي البيت....راحوا العتبة.........

....علشان يستخبوا وسط محلات الملابس..يمكن علشان هناك زحمة والله مشوار من حمامات القبة للعتبة علشان يستخبوا ...اية الجمال دة .. .احنا اخدنا الفراخ ودخلنا

علي المطبخ قلت لة انا عايز اسرع طبخة اتعملت ومش مهم ناكل حتي............ بس علشان يعرفوا اننا اكلنا

دة المطلوب ... وادبح الفراخ دي ..وجوة المطبخ كانت مهزلة بكل المقاييس الواحد مكانش حاسس بنفسة من كتر الضحك وبسرعة كانت الفراخ مية مية .تلات فراخات طبعا... وعملنا اكلة زي العسل..... علي فكرة استسمحنا

الست دي بعدين بسمن بلدي والذي منة علشان الحلال يعني ..لحسن تفتكروا اني مش كويس .المهم احنا خلصنا الطبيخ والعيال

مرجعتش.... اكلنا ومزيدا من الحسرة خلينا لهم تلات اجنحة منمنمين كدة وكل واحد كانة مخاصم التاني وكام واحد من القلوب الي جوة دي...محطوطين

بشكل يضحك في طبق....لا ومعملوهم سيرفس علي طريقة الفنادق الخمس نجوم

.علي الساعة 8 كدة هما رجعوا احنا طبعا ....كنا شبعنا ضحك اصلا

دخلوا.... ولسه هيتكلموا ويعتبوا علينا ...قلت لهم ...خلي بالك انت وهو من كلامك جوز الست دي

جالنا هنا وسأل عليكم ...ومعاة مطوة قرن غزال....زي الي بيمسكها اللمبي دي حاليا... وقتها مكانش فية لمبي الكلام دة من 14 سنة.....

كلامي كان يحمل نبرة تهديد.....المهم قالوا طيب فين الفراخ... قلت لهم فية حجات جوة ليكم

وهنا احنا وقفنا علي باب المطبخ ...علشان نشوف التعبيرات علي وشهم..... تلات جناحات وقلوب

يا قلبي عليهم...قال مفيش حد يقدر يعمل في مقلب قال .

ها ها هايييي

حدث في حمامات القبة ليلا

الليل ...جميل والنوم احلي بس لازم تكون في امان .... ...تخيل وانت نايم مثلا...انك

تصحي من النوم وتلاقي السرير الي انت نايم علية بيتهز بقوة وبيرتفع كمان

وتلاقي ديل معزة بيطير في الجو..... ولسه السرير بيتهز ....هتلاقي اكيد نفسك

بتصرخ وتطلب النجدة

نشوف الموضوع الازرق دة حصل ازي .......لو بتخاف اقفل المدونة لغاية اما اكتبلك حاجة حلوة

طبعا مفيش حد ينكر ان احلي ايام بتكون ايام الدراسة واصحاب الدراسة وكل ما كانوا الاصحاب منسجمين

وفية بينهم حب صعب يزعلوا من بعض بسرعة....بصراحة انا بستغل الموضوع دة

واحد من اصحابي دول كان من النوع الي بيفتخر انة بيخاف تخيلوا واحد بيفتخر انة بيخاف

فضلت اخشن فية جاية من الخشونة يعني يا واد اخشن شوية مفيش فايدة ...قلت لازم اديلة

درس خوف يا يحرم يخاف يااما يبقي يكمل حياتة في ام الخوف دة

انا كنت برسم وعايش في دور الفنان الي معاة الحامل واللوحات وعدة الرسم كاملة

والرسم دة والعدة بالذات ليها قصص كتير جاية وقصص اللوحات كمان

المهم حسيت ان ام الالهام في الفن مش هيجي غير فوق السطح اخدت العدة وطلعت

فوق السطح وندهت علي طيري ....اية الي انا بقولة دة...قصدي نصبت العدة وفضلت

ارسم علي بنت الجيران....قصدي ارسم علي اللوحة...وبصراحة ولا نفع السطح

اصلا كان فية رياح شديدة ...وموج اة موج.. في البحر يعني مش فوق السطح

لفت نظري ان وسط شوية كراكيب كدة خلي بالكم من كراكيب دي امال تسمية المدونة

جات من فراغ....لا دة كل حاجة ليها سبب ..هو احنا بنلعب...وسط الكراكيب دي

فية حاجة غريبة فيها شعر انا قربت اشوف اية دة لقيتة ....ديل معزة...لاوالظاهر كانت

معزة عايقة حبتين شعرها طويل اكيد كانت بتستخدم بانتين ...ولابرت بلص..ضحكت

ورميتة مكانة بس مش عارف انا الافكار عندي بترتب بعضها...اخدت الحجات بتاعتي ونزلت

ولا رسمت ولا حاجة....تاني يوم عدي عادي خالص...بس فاكر الاحساس دة انا كنت مرهق جدااا

ونمت شوية الظهر لقيت الاخ بيحاول يعمل في مقلب ..انة يحطلي قرطاس من ورق

الجرايد بين صوابع

رجلي ويولع فية ...انا كنت عايز اي حد بصراحة يعمل حاجة علشان يكون لي حجة

الرد ...وعلي راي

المثل القائل ...البادي اظلم... وتستخبالي في الدرة هستخبالك في القصب يا

عيسوي...سيبتة لغاية لما ولع

ورحت ببساطة ومن غير فزع شايلة ...وكملت نوم بس قبل ما انام قلت لة بس الي

ميزعلش...هولع فيك

بالسبيرتو...وكان عندي فعلا سبيرتو كنت بستخدمة في تثبيت الالوان في رسومات الفحم والباستل

بس ...قلت لا ...الليلة ليلتك ... وطلعت في البلكونة انا موضوع البلكونة دي بيجيب معاي سحر

مش عارف حسيت فية حاجة دلوقتي بتتسحب من عقلي الباطن ...أة...أة ..ديل المعزة...علشان

الشعر كان طويل ...فضلت وقت ..تنسحب...طبعا اخوكم نايم الظهر ومصهلل بالليل...الاخ قال

تصبحوا علي خير ودخل نام كانت الساعة 1 بعد منتصف الليل يعني عز الشغل...اتاكدت انة نام

وفتحت الباب ورحت فوق السطح ...بس مندهتش علي طيري لان

الجو...ليل ...اخدت..الديل ونزلت

وانا بضحك بهستريا...وانا لما اضحك... هتبقي فية مصيبة..الموضوع كبيرويلزمة اكتر من شخص

فيلم الموسم.....قلت لة اية رئيك نضحك...قالي علي اية...طبعا بمسكنة قلت لة شفت محمد عمل اية

قلت لة انا عايز ...العب معاة شوية تلعب معاي....قالي هتعمل اية..قلت لة لا وصحيت

الباقين يشجعواعلشان مفيش افلام من غير جماهير

نور وحسن ...كانت الشقة تلات اوض وصالة ...في حمامات القبة...حد يشتري... هي اتباعت خلاص

دخلت الاوضة الي نايم فية الضحية....وعاينت مسرح الجريمة ولاحتي مسؤل امني كبير

جبت بكرة من خيوط الشبك ...شبك الصيد علشان متينة ومش بتبان بالليل...وربطت

فيها الديل... ورميت الخيط ومررتة فوق مروحة السقف واخدت الباقي وسحبتة

وخليت الطرف برة باب الاوضة.....وعلشان مزيد من الحبكة السرير الي جنبة

نيمت فية مخدة وغطتها....علي اساس ان المواضيع كلها عادي وصاحبة الي معاة

في الاوضة......نايم في سابع نومة ويمكن يكون بدأ في الحلم رقم 9 كان فية ضوء خافت في الاوضة

اديت اشارة البدء.....ودخلت تحت سرير....الضحية وتامر خرج وقفل الباب وفي يدة طرف الخيط

بعد شوية وبعد الاستعدادت اللازمة.....تامر ابتدي يديني علامة ساعة الصفر...يشد الخيط ويرخية

انا جمعت كل قوتي ورفعت السرير....وهزيتة...وخلخلتة....وكل الحركات الي بتتعمل في منصات

البترول...ومصانع الحديد والصلب...الاخ الظاهر صحي مش مستوعب اية الي بيحصل

ولما فتح عيونة .....شاف......اية...دة....ديل معزة

بيطير....وصاحبة..نايم...والباب مقفول

....

والسرير بيتهز....كل دة...مع واحد خواف اصلا....انا حسيت من تحت السرير ان الواد قام ووقف

فوق السرير ....ولزق نفسة في الحيطة...وهاتك يا صراخ....صراخ ...انا طبعا بخاف في الحالات

الي زي دي ممكن يطب ساكت...رحت طالع من تحت السرير...بس كمان الواحد مش بيقدر

يكتم الضحك.....خرجت وجريت علي برة...وهو لما لقي الكل فطسان من الضحك...والي نايم من كثرة الضحك زي ا فلام الكرتون

الضحك والي كان قرب يغمي علية من الضحك المتواصل هستريا ...ضحك اشتغلت في الدور الرابع

في عمارة في اخر الشارع وبجوارها مدرسة....ابتدائي...خليكم متذكرين الكلام دة لان لسة فية بلاوي

المهم ....هو مسكين صعبت علية نفسة وبكي....انا سكت العالم دي وقلت لة لما انت مش اد المقالب

بتعملها لية....الموضوع دة فكرني بنكتة بتاعة ....نسر وحمار وبغبغان ...كانوا راكبين الطيارة

النسر كل شوية يدوس علي الزرار بتاع استدعاء المضيفة....تجي المضيفة تقولة نعم يقولها لا ابدا

كنت ب.....ستهبل....تمشي المضيفة...يقوم البغبغان دايس الزرار....وتجي المضيفة يقولها برضو

كنت ب.....ستهبل وكرروا الموضوع دة كتير....وكل مرة المضيفة تجي....الحمار قال اما ادوس

انا كمان .....داس...جات المضيفة قال لها ابدا كنت ب....ستهبل...راحت المضيفة اشتكت للكابتن

قالها لو حد عمل كده تاني افتح الشباك وارمية منة............... وداس الحمار تاني جات المضيفة

وراحت فاتحة الشباك ورمياهم من فوق....النسر طار لان عندة جوانح...علي وزن الاعلان اياة

والبغبغان طار لانة عندة جوانح....والحمار نازل صاروخ علي تحت....بيعتب علي النسر والبغبغان

قالوا ....لة في نفس واحد لما انت مش اد الا....ستهبال....بتستهبل لية......هنختم القصة دي

علشان انا صوابعي وجعتني من الكتابة ....وانتوا اكيد عيونكم وجعتكم من القراية...طيب ولما انتوا

مش اد القراية بتقروا ....لية المهم صاحبنا اصر انة يرحل عنا يسيب الشقة بالليل طبعا

الكل يحاول معاة.....مفيش فايدة...خلاص اخد قرار...انة يمشي...انا ادخلت برضو بمقلب اخر

وقلت لة بعد ما اديت اشارة ان الكل يسكت ويسيبة يمشي براحتة بس وجهت لة الكلام مباشرة

وقلت لة بس خلي بالك فية عند محطه المترو....عفريت...وانت في حالتك دي جواك استعداد لانك

اتعرضت للخوف الشديد....فممكن يلبسك...ودي حاجة علمية بحتة...انا خايف عليك...هو سمع كدة

ودخل نام علطول......................يتبع

فبركة جريمة قتل واشياء اخري

انتظرت ولم يخب ظني صرخة شقت قلب

الظلام يا لهوي الحقوني الحقوني.........يي

كتمت ضحكاتي وهرعت الية........ حلوة هرعت دي

مالك ياسمسم بدلعة كمان فية اية؟ تتتتتتتت ب نف ت ق ك قتتتتت

ده هو بيحاول يتكلم فية وحده مقتولة جوة

فين فين باستهبال ومين قتلها ؟؟ انت.. يعني ولا اية واتبعت اشارة يدة وفتحت الباب وبحركة مصطنعة

يا لهوي يا لهوي ده صحيح ... مزيد من الاستهبال جريت لبرة وكأني ههرب........ هحكيلكم القصة من الاول وربنا يستر ومتخدوش عني فكرة كدة ولا كدة
خارج بالليل بعد يوم شغل ممل وانا شارد شوية وماشي ناحية عربيتي كانت الساعة 9 بالليل تقريبا

وقبل ما اوصل العربية بلحظات لمحت حاجة غريبة مرمية في الارض انا اصلا راكن العربية بعيد

عن المحلات في ساحة كده علشان مفيش حد يقفل علي ومعرفش اخرج

اية ده انا بسئل نفسي ده منيكان الي بيحطوة في المحلات علشان يعرضو علية الملابس وكانت علي هيئة وحده ست بس بصراحة كانت من غير شعر
يعني منيكان زي القمر هههه علطول الفكرة اتخمرت

ومن غير ما حد ياخد بالة فتحت شنطة العربيه بسرعة ونظرة كدة رادار علي كل شء حوالية

وهب ارمي بسرعة في العربية ولفيت وركبت ولا من شاف ولا من دري طول الطريق اضحك واضحك

لاني بتخيل الموقف بالظبط وصلت عند البيت طبعا نزلت عادي وسيبت الامانة تحت ......بالليل وبعد الكل ما نام

نزلت بخفة وجبت الامانة (المنيكان) ودخلت بهدوء..... هسسسسسس دول علي فكرة اصحابي ...... طبعا انا عايز اخلي

لكل واحد نصيبة من ان المنيكان يرحب بية بطريقة خاصة المهم اتنين نايمين وواحد كان لسة برة

ركبت المنيكان هو كان مكسور في النص كده فية مسمار بيتربط منة واخيرا المليكان وقف علي رجلية

طبعا انا اطلع في البلكون اضحك اضحك وارجع بعد كدة رحت لافة بملاية سرير بقي زي الفل

وحدة ست واقفة وكانها حقيقي والليل بيساعد ...... شيلت الست دي واخدتها علي الحمام

المنيكان لحسن حد يفهمني غلط وفضلت اختار الاماكن الاستراتيجية للكارثة المحققة وقفتها

ورا الباب علطول .... وطفيت النور......... ورحت نمت بس مراقب كل حركة جة اول ضحية

مسكين مش عايز يزعجني بهدوء بيتصرف ومستغرب اكيد لاني اول مرة بنام بدري

مضيعش وقت بصراحة اخد فوطة وراح للحمام وانا وراه بهدوء.....فتح الباب ذهل رجع انصدم

وتلقائي لقيتة بيقفل الباب ويشد فية لبرة ويشد ومذعور انا هنافضلت اراقب واكتم في نفسي علشان

الضحك يعني هيفضح الدنيا ولما حسيت اني خلاص مش قادر امسك نفسي قلت يالا وقت الضحك

وشديتة ناحية البلكونة وكان زي الطفل الصغير مهاود جدااا وبهدوء اقنعتة انة يسكت علشان المقلب

يتعمل في الكل سكت يمكن علشان ميكونش حد احسن من حد .....عملت اخراج تاني لفيلم جديد

بنفس البطلة ........... المره دي حبكة سينمائية وعلي وزن افلام الرعب نيمتها في الحمام بالملاية
ومليت البانيو وهسسسسسسسسسسسسسسس....... نوم.... الضحية التانية الصباح باكر جداااا

يذهب الي الحمام كعادتة ........ يفتح الباب تن تن تن تن تن تن بربم بربم الموسيقي بتاعة افلام الرعب دي دة بئي صرخة من القلب

يا لهوي يا لهوي فية وحدة مقتولة جوة بس مسكين اتكعبل من كتر الخوف ووقع وحجات كتير

دة بئي زعل مني بعد ما عرف بس صالحتة وبرضو اقنعتة انة يسكت الغريبة برضو وافق .... الاخير

برضو مع تغير الاخراج ........... شوية بسيطة بس ده اتفزع من جوة دي بتبان علي ملامح الوش

لكل واحد تعبيرة عن الخوف وكل واحد الاشياء الي بيخاف منها دة بئي كان تعبيرة مزهل

بس من غير صوت بس نقدر نقول صرخة مكتومة ......بعد ما خلص الموضوع قابلتنا مشكلة

وهي ازي نتخلص من المنيكان ده طبعا مينفع يترمي علي السلم علشان حارس العمارة ينزلة

ولا ينفع حد ياخدة يرمية ممكن حد يقول حاجة مبدئيا قلت ارمية في البلكونة لغاية اما نشوفلة

حل بعد يومين نفس الشخص بتاع يا لهوي كان داخل البلكونة اتفزع تاني وقالي بحزم يا اخي

شوفلك صرفة في الزفت دة طبعا انا فضلت اضحك وهو فضل متغاظ لقيت ان الجيران كمان

بيبصوا للبلكونة بشئ من الريبة ...... اخدت قرار اني اقتلها بجد لا وكمان قطعت جثتها

في منتهي القسوة طبعا انك تقتل منيكان كان بيلبسوة الملابس علشان الناس تشتري

اهي ارتاحت من الوقفة طول الوقت في الفترينات....وحطيت راسها في كيس زي ما بشوف

في صفحات الحوادث....وبعد يومين تانين كنت جاي من الشغل لقيت قطع منها مرمية في الشارع

وعيونها بتبوصلي وتعاتبني انا اسف يا (منيكان ) مكنتش المقصود...........يتبع

حصار الاسئلة

لوكل واحد اعطي لنفسة فرصة للتفكيرالعمييييييييق ممكن يغرق

طب لو بس واحد فكورية صغينونة .... نشوف

...........................................

دماغ الانسان دة حكاية

بيحتفظ بكل صغيرة وكبيرة بس بطريقة غريبة جداا يعني زي دوائر

الماء لما نرمي فيها حجر بتتكون دوائر دوائر وتتلاشي

ونشوف بس بؤرة الدائرة دي الي في الوسط

أحياناً نفضل ساعات علشان نفتكر شئ معين وننام وتاني يوم نلاقي نفسنا افتكرنا الحاجة دي

يعني المخ كان بيستدعي المعلومة الي تلاشت واتركنت بعيد

نرجع لحصار الاسئلة هو مرتبط بالتفكير العميق الي انا كنت بتكلم عنة اغلبنا بيهرب من الاسئلة دي

وميعرفش ان كل شئ متخزن ومع اقل شئ بيحصل للانسان تيجي كل الاحزان وكأنها بتواسي بعض

ويتحاصر الواحد فينا ويلاقي نفسة كأنة منهار ..... ومش عارف لية كل دة مع ان الحاجة الي حصلت بسيطة ومتستاهلش

لو كل واحد فينا فكك حصار كل سؤال لوحدة ممكن يقدر يواجة حاجة معينة بتركيز اعلي الموضوع كلة مش دعوة للحزن والنكد

بس مجرد فترة تأمل كل شوية في حياتنا .....وخط سيرنا نوقف شوية نعدل نشطب نزيح حجات بسيطة كدة بدل ما تتكدس وترهقنا

فية حجات حوالينا تجنن تفرس تغيظ وكل المصطلحات الي ممكن تتقال في ان دمك ممكن يكون بقي عامل زي زيت العربيات القديم

كل واحد ممكن يختار حاجة ضخمة يفكر فيها فكر بس يا تري هتطلع بنتيجة ..... ارحم دماغك ده عنوان مدونة مع ان صاحبها

مش راحم دماغة خالص الغريبة كل العناوين الي قريتها في المدونات بتدل علي عكس ما المدون عايز ركزوا شوية كدة في الاسماء

يعني واحد كاتب عن نفسة انة فاشل في التدوين مع انة واد فظيع والبنت برايد كاتبة عايزة اتجوز وكل الحجات الي بتعملها دي

لو كانت حقيقية تطفش .....يعني هي مش عايزة ممكن نسميها عايزة بطريقة معينة من حقها طبعا يكون لها مواصفات معينة

وغيرهم كتير هنتكلم عنهم لمجرد الرأي بس .........بس قدروا يعملوا توافق مع ناس كتير باسلوب لذيذ وخفيف

والاهم انة من غير ما تقصد قدمت الدواء لكثير العلاج اننا نلاقي ناس بتعبر عنا واحنا نقول الله جميل جميل الكلام ده

ده اسمة توافق والتوافق ده لازم يتوفر بين اي حد وحد يكون فية بينهم حاجة مشتركة حتي لو كانت علاقة لدقائق

فما بالك من علاقة تستمر لسنوات بعيدة هنا لازم نتعلم ازي نعمل توافق ....لان الموضوع يستاهل

في الموضوع دة هيكون بشكل اوسع ومش من فراغ وبس كلام .... دي دورات علمية ومفيدة جدااا اخدتها كلها

الي مهتم يعرف اية يعني توافق واية يعني اني اكون بالنسبة لحد تاني شئ كدة مريح وركن مفضل لة في كل الاوقات

حاليا اسمحولي اخلي الاسئلة تحاصركم شوية

..............................................................

..............................................................

ياتري هتتألم لما تفوق علي واقع انت مش عايزة ولا حابة ؟؟

هتحس بألم علي زمن جميل عدي ومش هتقدر ترجعة ومش باقي منة غير شوية ذكريات ؟؟

مودك هيقفل لما تبص في المراية وتبقي مش عايز تشوف نفسك ؟؟

طيب لما تنادي بصوت عالي ومتلقيش حد يسمعك وصوتك مش واصل كام متر

ولما يوقع عليك ظلم وتلاقي نفسك مش قادر تنصر نفسك ولا حد ينصرك وكل الناس حياتها ماشية طبيعية ومش بعيد يلوموك ؟؟

واية اخبار ضحكتك وفرفشتك لما تتنازل وتتنازل عن حجات كتير علشان الحب والاحبة والي جابوهم كمان وترجع مكسور الخاطر ولا حد عبرك ؟؟

طيب لما تشد وتسلم علي يد بحرارة قوي وابتسامة صفراء وانت عارف ان اليد دي قتلت حد عزيز عليك او انها بتسعي في قتلة السؤال

ده بالذات مطلع عيني كل يوم مش انا الي بسلم ومش شرط اكون انا ممكن يتكرر مع اي حد او ما ينوب عنة ... ركزوا شوية معاي ؟؟

طيب ايه احساسك لما تحس ان وجودك وسط ناس مش علشانهم دة بس علشان تعرف تعيش وتحافظ علي وجودك انت بس ؟؟

تقدر توصفلي بتحس باية لما تغمض عيونك علي حلم جميل واخر الليل تصحي علي واقع مؤلم ؟؟

اشرحلي حسرتك لما تلاقي حجات جواك وحواليك بتتلون وتتغير للاسؤ وانت صامت صامت صامت للصبح ممكن اكررها صامت دي ؟؟

طيب ممكن برضو تقولي احساسك برضو عن تنازلك عن احلامك حلم ورا حلم علشان تعيش ؟؟؟

طيب لما تضحك وتضحك وتعلي صوتك بالضحك علشان بس توطي صوت الحزن جواك وتنزل دموع فرح وهي بالاصل دموع حزن ؟؟

لما تلبس قناع الفرح علشان تداري ملامح الحزن الي اترسمت علي وشك الحزين ؟؟

فية حد ممكن يحاصرني بالاجوبة ولو حصار واحد ؟؟؟؟؟؟؟؟؟؟؟؟؟

سنة اولي تدوين

بعد ان انشأت مدونتي الخاصة هاجمني سؤال مهم جدااا لماذا اكتب وادون ؟؟؟

هل لمجرد ان من يكتب يريد ان يري اسمة يزيل تلك الكتابات بغض النظر عن الموضوع الذي يكتب عنة وملائمتة

لكل شئ من حولة وماذا تبقي ان اكتب عنة ؟؟؟

الاف البشر يكتبون كل يوم بل في نفس اللحظة عن نفس الشئ وهل فكرة الكتابة تأتي او اننا من يستجلبها ونتودد

اليها ونستعطفها ام انها اي فكرة الكتابة هي من تلح علينا وتكرهنا علي الكتابة حتي لو بايدي مرتعشة خائفة اعترف

اني كثيرا ما شدني موضوع او كاتب او حتي رسالة شكوي لجريدة فاغيب عن الدنيا وعن ما حولي والصادق منها ما

يفعل بي ذلك الصادق فقط وروعة التعبير وجمال المعني بعد ذلك واكرر ما قرأت واتلذذ بكل كلمة لاكون جملة خاصة

اريد انا اكتب واتمادي في كل شئ ولكني لا احب ان اتعدي تلك الخطوط الحمراء التي رسمتها لنفسي واولها......... قولة تعالي (( لايحب الله الجهر بالسؤ من القول الا من ظلم )) لا احب ان اشتم او اذم احداالانها ليست بلغة حوار....لا

لا يجب ان اكتب في النميمة لقولة تعالي (( ايحب احدكم ان يأكل لحم اخية ميتا فكرهتموة )) احب من ينقل صورة

حية من الحياة من غير خوف او جبن ولكن يراعي ما سبق معادلة صعبة......... ولكن لو تحققت فستكون جميلة

هناك شئ اخر بعد ان تكتب هل كتابتك ستكون لك لوحدك او انك تحب انا يشاركك فيها الاخرين كثير من المدونين يكتب

لمجرد الكتابة لا يهتم بعدد زوار مدونتة وكانة يمارس عادة جميلة تشبع شئ بداخلة

منا حلو اهو وبعرف اكتب البوقين الي فوق دول مية مية بس من قلبي واللة انتظروني يا بشر