٢١‏/٠٢‏/٢٠٠٧

حصار الاسئلة












لوكل واحد اعطي لنفسة فرصة للتفكيرالعمييييييييق ممكن يغرق
طب لو بس واحد فكورية صغينونة .... نشوف
...........................................

دماغ الانسان دة حكاية



بيحتفظ بكل صغيرة وكبيرة بس بطريقة غريبة جداا يعني زي دوائر




الماء لما نرمي فيها حجر بتتكون دوائر دوائر وتتلاشي



ونشوف بس بؤرة الدائرة دي الي في الوسط


أحياناً نفضل ساعات علشان نفتكر شئ معين وننام وتاني يوم نلاقي نفسنا افتكرنا الحاجة دي


يعني المخ كان بيستدعي المعلومة الي تلاشت واتركنت بعيد



نرجع لحصار الاسئلة هو مرتبط بالتفكير العميق الي انا كنت بتكلم عنة اغلبنا بيهرب من الاسئلة دي


وميعرفش ان كل شئ متخزن ومع اقل شئ بيحصل للانسان تيجي كل الاحزان وكأنها بتواسي بعض



ويتحاصر الواحد فينا ويلاقي نفسة كأنة منهار ..... ومش عارف لية كل دة مع ان الحاجة الي حصلت بسيطة ومتستاهلش


لو كل واحد فينا فكك حصار كل سؤال لوحدة ممكن يقدر يواجة حاجة معينة بتركيز اعلي الموضوع كلة مش دعوة للحزن والنكد


بس مجرد فترة تأمل كل شوية في حياتنا .....وخط سيرنا نوقف شوية نعدل نشطب نزيح حجات بسيطة كدة بدل ما تتكدس وترهقنا


فية حجات حوالينا تجنن تفرس تغيظ وكل المصطلحات الي ممكن تتقال في ان دمك ممكن يكون بقي عامل زي زيت العربيات القديم


كل واحد ممكن يختار حاجة ضخمة يفكر فيها فكر بس يا تري هتطلع بنتيجة ..... ارحم دماغك ده عنوان مدونة مع ان صاحبها


مش راحم دماغة خالص الغريبة كل العناوين الي قريتها في المدونات بتدل علي عكس ما المدون عايز ركزوا شوية كدة في الاسماء


يعني واحد كاتب عن نفسة انة فاشل في التدوين مع انة واد فظيع والبنت برايد كاتبة عايزة اتجوز وكل الحجات الي بتعملها دي



لو كانت حقيقية تطفش .....يعني هي مش عايزة ممكن نسميها عايزة بطريقة معينة من حقها طبعا يكون لها مواصفات معينة



وغيرهم كتير هنتكلم عنهم لمجرد الرأي بس .........بس قدروا يعملوا توافق مع ناس كتير باسلوب لذيذ وخفيف




والاهم انة من غير ما تقصد قدمت الدواء لكثير العلاج اننا نلاقي ناس بتعبر عنا واحنا نقول الله جميل جميل الكلام ده




ده اسمة توافق والتوافق ده لازم يتوفر بين اي حد وحد يكون فية بينهم حاجة مشتركة حتي لو كانت علاقة لدقائق




فما بالك من علاقة تستمر لسنوات بعيدة هنا لازم نتعلم ازي نعمل توافق ....لان الموضوع يستاهل



في الموضوع دة هيكون بشكل اوسع ومش من فراغ وبس كلام .... دي دورات علمية ومفيدة جدااا اخدتها كلها




الي مهتم يعرف اية يعني توافق واية يعني اني اكون بالنسبة لحد تاني شئ كدة مريح وركن مفضل لة في كل الاوقات


حاليا اسمحولي اخلي الاسئلة تحاصركم شوية
..............................................................
..............................................................

ياتري هتتألم لما تفوق علي واقع انت مش عايزة ولا حابة ؟؟


هتحس بألم علي زمن جميل عدي ومش هتقدر ترجعة ومش باقي منة غير شوية ذكريات ؟؟


مودك هيقفل لما تبص في المراية وتبقي مش عايز تشوف نفسك ؟؟


طيب لما تنادي بصوت عالي ومتلقيش حد يسمعك وصوتك مش واصل كام متر



ولما يوقع عليك ظلم وتلاقي نفسك مش قادر تنصر نفسك ولا حد ينصرك وكل الناس حياتها ماشية طبيعية ومش بعيد يلوموك ؟؟


واية اخبار ضحكتك وفرفشتك لما تتنازل وتتنازل عن حجات كتير علشان الحب والاحبة والي جابوهم كمان وترجع مكسور الخاطر ولا حد عبرك ؟؟


طيب لما تشد وتسلم علي يد بحرارة قوي وابتسامة صفراء وانت عارف ان اليد دي قتلت حد عزيز عليك او انها بتسعي في قتلة السؤال


ده بالذات مطلع عيني كل يوم مش انا الي بسلم ومش شرط اكون انا ممكن يتكرر مع اي حد او ما ينوب عنة ... ركزوا شوية معاي ؟؟


طيب ايه احساسك لما تحس ان وجودك وسط ناس مش علشانهم دة بس علشان تعرف تعيش وتحافظ علي وجودك انت بس ؟؟



تقدر توصفلي بتحس باية لما تغمض عيونك علي حلم جميل واخر الليل تصحي علي واقع مؤلم ؟؟





اشرحلي حسرتك لما تلاقي حجات جواك وحواليك بتتلون وتتغير للاسؤ وانت صامت صامت صامت للصبح ممكن اكررها صامت دي ؟؟



طيب ممكن برضو تقولي احساسك برضو عن تنازلك عن احلامك حلم ورا حلم علشان تعيش ؟؟؟


طيب لما تضحك وتضحك وتعلي صوتك بالضحك علشان بس توطي صوت الحزن جواك وتنزل دموع فرح وهي بالاصل دموع حزن ؟؟



لما تلبس قناع الفرح علشان تداري ملامح الحزن الي اترسمت علي وشك الحزين ؟؟


فية حد ممكن يحاصرني بالاجوبة ولو حصار واحد ؟؟؟؟؟؟؟؟؟؟؟؟؟

هناك ٢٤ تعليقًا:

غير معرف يقول...

اه يا دماغي يا انا من اسئلتك دي طيب

هرد عليك تاني

أبو محمد يقول...

صباح الفل ياعم عادل ادينى جيت علشان أسمع السر اللى عايز تقولهولى
نصيحه أخويه ماتستعجلش فى الرجوع من الكويت العيشه فى مصر خصوصا للى جرب يعيش فى بلاد تانيه عذاااااب والتعامل مع الناس صعب والمواصلات حتى لو عندك عربيه بهدله وقرف خليك عندك للأخر وماتنزلش الا مستريح وعلى حاجه كويسه
سلام وخليك دايما على الخط

Unknown يقول...

أسئلتك حلوه ومن حقك انك تدور علي اجابات عنها.
واسمحلي اني أجاوبهم.
ياتري هتتألم لما تفوق علي واقع انت مش عايزة ولا حابة ؟؟
أكيد بس هحاول أغيره بأي طريقه

هتحس بألم علي زمن جميل عدي ومش هتقدر ترجعة ومش باقي منة غير شوية ذكريات ؟؟
المفروض اني أحوله لذكري جميله لأن الاحساس بالأم مش هيفيد بحاجه هو بس هيخليني ماعرفش أعيش.

مودك هيقفل لما تبص في المراية وتبقي مش عايز تشوف نفسك ؟؟
أكيد وعشان كده مش المفروض اننا نعمل حاجه تخلي ده شعورنا نحية نفسنا.

طيب لما تنادي بصوت عالي ومتلقيش حد يسمعك وصوتك مش واصل كام متر ؟؟
هعلي صوتي أكتر, وأكيد هلاقي حد يسمعه

ولما يوقع عليك ظلم وتلاقي نفسك مش قادر تنصر نفسك ولا حد ينصرك وكل الناس حياتها ماشية طبيعية ومش بعيد يلوموك ؟؟
ده احساس وحش أوي, بس لازم تكون واثق انك طالما مظلوم ربنا هينصرك.

واية اخبار ضحكتك وفرفشتك لما تتنازل وتتنازل عن حجات كتير علشان الحب والاحبة والي جابوهم كمان وترجع مكسور الخاطر ولا حد عبرك ؟؟
انت حبيت بجد, يعني كسبت, ولما ترجع مكسور مش هتكون خسرت غير الماضي, وهما اللي هيخسرو انسان مش هيلاقو زيه تاني.


طيب لما تشد وتسلم علي يد بحرارة قوي وابتسامة صفراء وانت عارف ان اليد دي قتلت حد عزيز عليك او انها بتسعي في قتلة
اوعي تعمل كده, وقول للقاتل في وشه انت قاتل.


طيب ايه احساسك لما تحس ان وجودك وسط ناس مش علشانهم دة بس علشان تعرف تعيش وتحافظ علي وجودك انت بس ؟؟
يبقي الغلط فيا, لأني سمحت لنفسي انها تعمل كده.


تقدر توصفلي بتحس باية لما تغمض عيونك علي حلم جميل واخر الليل تصحي علي واقع مؤلم ؟؟
أها ماقولكش, بيبقي في حاجه بتوجع جواك أوي, وبتحس ان الوجع ده عمره ماهيخف, بس الحمد لله, بيرجع يخف.


اشرحلي حسرتك لما تلاقي حجات جواك وحواليك بتتلون وتتغير للاسؤ وانت صامت صامت صامت للصبح ممكن اكررها صامت دي ؟؟
ماتسمحش لحد أو لأي كائن انه يغير الانسان اللي جواك أو انه يشوهه, احتفاظك به, هو انتصارك علي كل حد جرحك أو ظلمك أو جه عليك.

طيب ممكن برضو تقولي احساسك برضو عن تنازلك عن احلامك حلم ورا حلم علشان تعيش ؟؟؟
لما تتنازل عن أحلامك يبقي انت كده مش عايش, انت ميت بس بيتنفس, يبقي ماينفعش اننا نتنازل عنها.


طيب لما تضحك وتضحك وتعلي صوتك بالضحك علشان بس توطي صوت الحزن جواك وتنزل دموع فرح وهي بالاصل دموع حزن ؟؟
عارفه الاحساس ده, لما كل الناس تحسب انك مبسوط جدا, وانت من جواك بتموت, اللي بيوجع أكتر ان مفيش حد حاسس بيك, بس لأن ربنا هو الوحيد اللي عارف اللي جواك, هيساعدك وهيخفف عنك.


لما تلبس قناع الفرح علشان تداري ملامح الحزن الي اترسمت علي وشك الحزين ؟؟
بعدها بشويه مش هيبقي قناع, وهتبقي سعيد بجد, حتي لو عشان سعادتك ممكن تسعد حد حواليك.

معلش أنا طولت عليك, بس أتمني اني أكون ساعدتك, أو قدرت أخفف عنك (:

غير معرف يقول...

صديقى عادل

أصدقائى وأهلى بيقولوا عليا إنى منظم جدا لدرجة الملل..

وفعلا أنا مش بحب أشوف أى كراكيب فى البيت أو المكتب .

ودايما حاجتى كلها منظمة بشكل جيد .. ولكن هذه هى

أول مرة أحب فيها الكراكيب ، لأنها فعلا أكثر من رائعة....

وتقريبا كلها عجبتنى ولكنى توقفت كثيرا عند هذه الكركوبة:

وإيه أخبار ضحكتك وفرفشتك لما تتنازل وتتنازل عن حاجات

كتير عشان الحب والأحبة وإلى جابوهم كمان .............

وترجع مكسور الخاطر ولا حد يعبرك .

الله عليك .. أصبت كبد الحقيقة لأكثر من 98% من الشباب

المصرى إللى بيعيش مطحون فى بيت أهله الغلابة ،

ومستنى بطلوع الروح إنه يكمل تعليمه الجامعى.. عشان

يبقى بيه ، ويكتشف بعد كده أنه إنضم لطابور العاطلين على

القهوة ، أو على الناصية لو ماكانش معاه حق المشاريب

وبعدين يضطر يشتغل صبى سباك أو نقاش أو أى حاجة...

( طب وكان إيه لازمة التعليم من الأول ) عشان يحوش حق

الشبكة ، وخلال هذه الفترة يستحمل غتاتة أخوها وسماجة

أختها و ألاطة أبوها وطلبات أمها إللى مابتخلصش .

وبعد مايلم حق الشبكة .... يطلبوا منه يعمل فرح بالشئ

الفلانى ويضطر يستلف حق تكاليف الفرح ويشتغل سنتين

تلاتة عشان يسدد فلوس الفرح ..... وبعدها يفاجئ بأهل

حبيبته بيقولو له إنه بقى له 3سنين وماجابش الشقة ...

يبقى نفسخ الخطبة وتروح عليك الشبكة عشان إنتى اللى

غلطان ، وطبعا بيكون العمر جرى بيه ويادوب يقدر يلم حق

الكفن بتاعه بدل مايندفن صدقه ... ( كفاية كده )

عموما أهنئك على كراكيبك الجميلة ، وعلى فكرة أنا قرأت

لك قبل كده حكايه الحب الأعمى الذى يقوده مجنون ،

وهى تحفة روائية ، وأحييك عليها بشدة .

تحياتى لك صديقى العزيز

Sunflower

مجهول يقول...

عااادل
الاجابات علي اسئلتك
ياتري هتتألم لما تفوق علي واقع انت مش عايزة ولا حابة
اكيد حتألم بس مش حقف ثابت زي الحجر اكيد حثور
هتحس بألم علي زمن جميل عدي ومش هتقدر ترجعة ومش باقي منة غير شوية ذكريات ؟؟
يمكن اه بس حعيش لاني بحب دايما اتجدد
مودك هيقفل لما تبص في المراية وتبقي مش عايز تشوف نفسك ؟؟
ساعات بتحصلي بس حفتكر حاجه حلوه في حياتي تخرجني من المود
طيب لما تنادي بصوت عالي ومتلقيش حد يسمعك وصوتك مش واصل كام متر ؟؟
حفضل انادي وانادي لغايه ملاقي اللي يسمع
ولما يوقع عليك ظلم وتلاقي نفسك مش قادر تنصر نفسك ولا حد ينصرك وكل الناس حياتها ماشية طبيعية ومش بعيد يلوموك ؟؟

ولا يهمني مادام انا مظلوم ححارب علشان اشيل الظلم اللي عليا

واية اخبار ضحكتك وفرفشتك لما تتنازل وتتنازل عن حجات كتير علشان الحب والاحبة والي جابوهم كمان وترجع مكسور الخاطر ولا حد عبرك
سؤال معقد منك لله
طيب لما تشد وتسلم علي يد بحرارة قوي وابتسامة صفراء وانت عارف ان اليد دي قتلت حد عزيز عليك او انها بتسعي في قتلة
ابقا منافق او مغفل او ضعيف
طيب ايه احساسك لما تحس ان وجودك وسط ناس مش علشانهم دة بس علشان تعرف تعيش وتحافظ علي وجودك انت بس ؟؟

لا طبعا ساعتها حبعد بعيد لغايه ما احس بقيمه الناس
تقدر توصفلي بتحس باية لما تغمض عيونك علي حلم جميل واخر الليل تصحي علي واقع مؤلم ؟؟
بصحي من النوم عايز اشرب قهوه
اشرحلي حسرتك لما تلاقي حجات جواك وحواليك بتتلون وتتغير للاسؤ وانت صامت صامت صامت للصبح ممكن اكررها صامت دي ؟؟
ابقا مش انا اقف دقيقه حداد علي نفسي لاني اتغيرت بغير ارادتي
طيب ممكن برضو تقولي احساسك برضو عن تنازلك عن احلامك حلم ورا حلم علشان تعيش ؟؟؟
ساعات بتحصل بس مش بخجل من نفسي و ابرر هزيمتي في تحقيق حلمي لا برجع تاني واحارب
طيب لما تضحك وتضحك وتعلي صوتك بالضحك علشان بس توطي صوت الحزن جواك وتنزل دموع فرح وهي بالاصل دموع حزن ؟؟

مش قلتلك منك لله
لما تلبس قناع الفرح علشان تداري ملامح الحزن الي اترسمت علي وشك الحزين ؟؟

ببقا مكسور
منك لله يا عادل ياريتني يا عم مادخلت مدونتك
ايه الكأبه دي ياعم
فرفش فرفش
لسه فيه حاجات حلوه

عاشقة الوطن يقول...

عادل أسألتك حيرتنى على حيرتى
بس ممكن أحاول أرد عليها وربنا يستر

ياتري هتتألم لما تفوق علي واقع انت مش عايزة ولا حابة ؟؟

أكيد هتألم وهتعب جدا كمان

هتحس بألم علي زمن جميل عدي ومش هتقدر ترجعة ومش باقي منة غير شوية ذكريات ؟؟

الواحد مش ممكن يتألم هو ممكن يموت فيها

مودك هيقفل لما تبص في المراية وتبقي مش عايز تشوف نفسك ؟؟

ممكن فى حالة ان انا مش انا وانى اتغيرت فعلا بس للأسوأ

طيب لما تنادي بصوت عالي ومتلقيش حد يسمعك وصوتك مش واصل كام متر ؟؟

أكيد هتعب جدا عشان اعرف أوصل صوتى وفى الاخر محدش يسمعنى وصوتى بعيد ومش واصل ده يبقي الاحباظ ذاته

ولما يوقع عليك ظلم وتلاقي نفسك مش قادر تنصر نفسك ولا حد ينصرك وكل الناس حياتها ماشية طبيعية ومش بعيد يلوموك ؟؟

فى الحالة ديه ممكن أدور على عالم تانى أعيش فيه من غير عتاب ومن غير ظلم ممكن نحس بيه أو نشعر بيه
بس ياترى هلاقيه فين؟؟؟؟

واية اخبار ضحكتك وفرفشتك لما تتنازل وتتنازل عن حجات كتير علشان الحب والاحبة والي جابوهم كمان وترجع مكسور الخاطر ولا حد عبرك ؟؟

ماأظنش ان التنازل هيفيدنى كتير يبقي ليه أتنازل من الأول
وممكن أتنازل فى حالة ان اللى قدامى يستاهل بجد
مش أجى على حد بايعنى وأتنازل عشانه
بس فى الحالة ديه ماأظنش انه هيكون فيه ضحكة خااااالص

طيب لما تشد وتسلم علي يد بحرارة قوي وابتسامة صفراء وانت عارف ان اليد دي قتلت حد عزيز عليك او انها بتسعي في قتلة السؤال

يااااااه بيتهيألى انى مش هأقدر أسلم لان فى الحالة ديه ممكن أقتل اللى قدامى
مينفعش أصلا أمد أيدى
ليه هى الاهانة والاستهزاء ممكن يوصلوا للدرجة ديه

ده بالذات مطلع عيني كل يوم مش انا الي بسلم ومش شرط اكون انا ممكن يتكرر مع اي حد او ما ينوب عنة ... ركزوا شوية معاي ؟؟

ممكن أقولك اللى بيقبل بده حتى لو هو اللى بينوب عننا يبقي ديه الاهانة الحقيقة لان ده بيفرش علينا شئ واحنا مش قادرين ومش عاوزين نقبله

طيب ايه احساسك لما تحس ان وجودك وسط ناس مش علشانهم دة بس علشان تعرف تعيش وتحافظ علي وجودك انت بس ؟؟

يبقي ايه لازمتها العيشة مع ناس مش مقدرة اللى بيعيشوا معاهم

تقدر توصفلي بتحس باية لما تغمض عيونك علي حلم جميل واخر الليل تصحي علي واقع مؤلم ؟؟

أكيد هأشعر بمرارة وألم

اشرحلي حسرتك لما تلاقي حجات جواك وحواليك بتتلون وتتغير للاسؤ وانت صامت صامت صامت للصبح ممكن اكررها صامت دي ؟؟

أى حسرة ممكن تتوصف ولا تتقال

طيب ممكن برضو تقولي احساسك برضو عن تنازلك عن احلامك حلم ورا حلم علشان تعيش ؟؟؟

ماأنا قلت مفيش حاجة أقدر أوصفها لانها أكتر من أنها تتوصف

طيب لما تضحك وتضحك وتعلي صوتك بالضحك علشان بس توطي صوت الحزن جواك وتنزل دموع فرح وهي بالاصل دموع حزن ؟؟

أكيد اللى جواية جرح وألم مايتوصفش بس ممكن يكون ده ضعف منى لانى مش قادرة أفرح بجد وبداري حزنى بفرح مزيف

لما تلبس قناع الفرح علشان تداري ملامح الحزن الي اترسمت علي وشك الحزين ؟؟

بحس باختناق ممكن يموتنى


والله أسئلتك حلوة وتخلى الواحد يسأل نفسه بجد ومش عارف ياترى هو كده فعلا جاوب على اللى ممكن يشعر بيه فى الواقع ولا ممكن يتغير فى الحقيقة ولما يلاقي نفسه فعلا جة حصار الموقف نفسه

تحياتى الشديدة لك ولمدونتك الجميلة جدااااا

وشكرا لزيارتك لمدونتى المتواضعة

كراكيب عادل يقول...

mnd

سلامة دماغك شكلك هتشرب شاي في مكان تاني
كنت تقول وانا اجيبلك من القهوه الي تحت بيتنا لان للاسف البن خالص من عندي

كراكيب عادل يقول...

ابو محمد

يا عم لازم تكشف السر علي الملاء كده انا كنت هوشوشك معلش بس برضو انا تعبت من صقيع الغربة ومحتاج دفء الوطن
تعالي مكاني واجي مكانك نبدل يعني

تحياتي وشكرا لمرورك والمره الجاية وطي صوتك الحيتان لها زعانف

كراكيب عادل يقول...

esraa

انت حبيت بجد, يعني كسبت, ولما ترجع مكسور مش هتكون خسرت غير الماضي, وهما اللي هيخسرو انسان مش هيلاقو زيه تاني.
عجبني جدااا الرد ده

شكرااا بجد ردودك جميله اغلب ردودك منطقية وكنت اريدها غير ذلك

شكرا لمرورك الكريم

كراكيب عادل يقول...

مجهول
انا نفس امررلك التاج الي ماشي اليومين دول علشان اعرف اكشف هويتك اللذيذه

بصحي من النوم عايز اشرب قهوه

احساس حلو انك تحب تشرب قهوة في الزنقة زي الي بيتحجج يشرب سيجاره لما يكون متضايق يعني وصل المعني

كلامك مقنع بس شكلك محاصر اعترف

شكرا لمرورك صديقي

كراكيب عادل يقول...

عاشقه الوطن


والله أسئلتك حلوة وتخلى الواحد يسأل نفسه بجد ومش عارف ياترى هو كده فعلا جاوب على اللى ممكن يشعر بيه فى الواقع ولا ممكن يتغير فى الحقيقة ولما يلاقي نفسه فعلا جة حصار الموقف نفسه

احييك اصبتي كبد الحقيقة
احنا بنحط نفسنا بدل الناس دي بالكلام وممكن نتخيل بس الواقع غير

ردك بيعبر عن شخصية متزنة وراسية علي الفولة وقشرتها

شكرا لمرورك

كراكيب عادل يقول...

Sunflower

اهرب بجلدك من الحصار نط من فوق السور هتوقع بس ممكن توقف تاني احسن ما تبقي طول عمرك محاصر جواك فيه طموح بس حاسس انك متكتف


شكراا لمرورك وتعليقك ده كان علي شكل رساله انا جبته هنا

تحياتي

يا مراكبي يقول...

أولا شكرا لزيارتك ليا في المدونة وأهلا بيك في عالم التدوين

هلا والله

لكن نرجع للأسئلة اللي سألتها هنا .. واضح إنك تعبان من حاجة كبيرة .. أرجوا إنها ماتكونش نفس الحاجة اللي تعباني
أنا كمان

آلام الغربة وإحنا بعيد عن الوطن .. وآلام الوطن اللي مخليانا في غربة

-_- يقول...

انا حاسس ان افكارك عايشة في غربة و هي في جواك

كراكيب عادل يقول...

يا مراكبي

سعدت كثيرا عندما فتحت التعليقات ووجدت كلمات يا مراكبي وصورتك علي اليمين انا حاسس اني اعرفك او شوفتك حاسس كمان زي ما قلت لك اننا في نفس الخندق بنحارب حجات كتير كل يوم يطول شرحها الجمله الاخيره هزتني لو انت جنبي كنت بحلقت فيك جامد وكلمت نفسي وقلت انت بجد فاهمني

كراكيب عادل يقول...

الفاضل sharm

طبيعي ان بعض الاحاسيس تكون غريبة جواك وخاصة الاحاسيس الغير مقبولة للنفس البشرية كالغدر والخيانة والكذب فيه ناس بتتأقلم عليها وتتعايش معها وناس الي هي ناس بتلفظ تلك الاحاسيس زي البحر ما بيرمي اي حاجه غريبه عنه علي الشط
تحياتي شكرا لمرورك

Reema يقول...

لفت نظري حكاية اسماء الممدونات على غير مسمى :)
بس ممكن اقولك ان مدونتك كمان كده اسمها كراكيب عادل
مع اني شايفاها مش كراكيب ولا حاجة
:D
بالنسبة اننا بننسى وبنقعد نعصر في
دماغنا لغاية مانفتكر دي للأسف عندي انا بنسى بشكل مرعب وممكن اكون حاعمل حاجة دلوقتي وبعد شوية انسى انا كنت حاعمل ايه المشكلة ان الحكاية دي بتزيد ومش عارفة اخرتها ايه
مدونتك جميلة استمر فيها

كراكيب عادل يقول...

ريما
كراكيب عادل المدونه يمكن مش كراكيب لكن فية كراكيب في نفسي وانا كاتب لكل واحد فوضي مرتبة ولا مفتعلة شجن ذكريات اشخاص مواقف في نفس كل واحد فوضي ممكن نسميها كركبة
بالنسبة للعصر ده والنسيان لاننا حملنا ادمغتنا فوق الطاقة وشتتناها والبركة كمان في التكنولوجيا لو تذكرت انك مرة سافرتي شالية مثلا في جو هادي من غير الضغوط هتلاقي دماغك صافي

وصعب نهجر كل دة ونروح للبدائية خلاص الي حصل حصل

شكرا لمرورك ومدونتك انتي اجمل وخاصة
الالوان

الأباصيرى يقول...

وأنا اللى كنت فاكر أن دماغى بس اللى هنجت من كتر الأسئلة

ياريت تحطنى معاك ولما تلاقى أجوبة

خصوصا السؤال دة لانى مش لاقيلة إجابة

واية اخبار ضحكتك وفرفشتك لما تتنازل وتتنازل عن حجات كتير علشان الحب والاحبة والي جابوهم كمان وترجع مكسور الخاطر ولا حد عبرك ؟؟

كراكيب عادل يقول...

اباصيري

تعرف فعلا الي بيحب يضحك ويسعد الناس بيكون الغالب هو نفسة تعيس وبيكون عندة عطاء ده عن تجربة لناس كتير


التنازلات ما زلت مستمرة يا سيدي



تحياتي

سلسبيل يقول...

طيب لما تضحك وتضحك وتعلي صوتك بالضحك علشان بس توطي صوت الحزن جواك وتنزل دموع فرح وهي بالاصل دموع حزن ؟؟

لما تلبس قناع الفرح علشان تداري ملامح الحزن الي اترسمت علي وشك الحزين


يامساء الخير
انا كنت داخله انام ف امان الله لاقيت الاسئله
النوم طار.
.فكرتني بقناع الفرح والابتسامه اللي غصبن عني بتترسم وانا شايفه حقي بيتاخد ومش عارفه اعمل حاجه
..كل
(هههههههههههه)
باقولها قدام الكل حتي لو ميته م الزعل.ومحتاجه افضفض
.وكل (اهئ اهئ اهئ) ماحدش سامعها الاربنا
.اااه بس اقول ايه ولا ايه
عاجبك كده
اهو انا بوظت كده دماغ الكنافه اللي كنت واكلاها قبل مانام ودمش كويس خااالص علي فكره:))

كراكيب عادل يقول...

انا اعزمك علي كنافة نابلسية غيرها
بس ايه حكاية تعرفيها الاول ولا لا الحمرا دي الي فيها جبنة وبتمط كدة

وبعدها تقعدي تبلجريلك شوية بلجرة علي الماشي وتكتبلك بوست من الي قلبك يحبة وتقولي


وبعدين هو النوم بالعافية

سلسبيل يقول...

لا ماعرفهاش بس عاده اي حاجه حمرا وفيها جبنه وبتمط اكيد تستحق التجربه:))
وبعدين انا معاك ان النوم مش بالعافيه...بس عندنا ف البيت الصحيان بالعافيه هههههههههه اي حد صاحي بدري مايستريحش الا لما يتسلي علي خلق الله النايمين ويصحيهم زيه وبما اني احسن واحده ممكن حد يغلس عليها ويصحيها فلازم اخد احتياطي وانام عشان اصحي قبلهم واغلس انا عليهم

كراكيب عادل يقول...

سلسبيل

انا عموما بحب اكل دايما مع الناس الي بتحب الاكل لانهم بيفتحوا النفس اكتر من الاكل نفسة زي

الغلاسة جميلة بس انا الغلس اكون اغلس منة واحد صاحبي صحاني من النوم مرة بيستهبل خليتة نام بالليل وفي عز نومة جبت راديو من النوع الصغير وشغلتة ورميتة في ابعد مكان تحت سريرة وطفيت النور واتهني بالنوم طبعا عارفة ايه الي ممكن يحصل علشان يجمع الراديو ويطفي النور وغيرة علشان يحرم