10‏/03‏/2007

حرامية الفراخ قلالات الادب !!!!


كل ما اجي اكتب حاجة سن القلم يبوظ.... علشان كدة الخط ممكن يكون وحش
شوية...متشكر جداا من كل الناس الي علقت عندي واسف علي التأخير...المهم


بعد ما صاحبنا...زعل... وغضب... تاني يوم عزمناة علي الغدا...وظبطناة خالص


ونندهلة باسم الدلع بتاعة روح يا حمادة تعالي يا حمادة لدرجة ان الواد اتمنا يكون اتعمل فية مقلب


من زمان ...ومرت الايام وراحت الايام ...وفي قعدة صفا في البلكونة متجمعين وبنشرب شاي العصرية قال يعني عالم رومانسية ...


خدنا الكلام للمقلب بتاع زمان وعلي رأي المثل قل للزمان ارجع يا زمان وفضلنا نضحك ...هو رد علينا وقال طيب تعرفوا انا اصلا مكنتش خايف...الواد كان هيموت ويقلك مكنتش خايف . ....


انا استغربت اية الجراءة دي... قال.... ولا حد يقدر يعمل في مقالب تاني...انا بسرعة البرق


غيرت الموضوع ودخلت في حجات تاني خالص...وبعدين انا لمحت فراخ في حوش المدرسة تحت


مليش دعوة مش هقول تاني المدرسة الي في اخر الشارع ...واحنا بنطل عليها ...فضلت اتكلم عن


الاكل وطعامة الفراخ والمغامرات وغيرة...وبحركات ملتوية وكلام عن رباطة الجأش ...حلوة الجأش


دي.... اقنعت حمادة وحسن انهم ينزلوا ويلفوا من ورا ويمسكوا الفراخ دي ...وانا هنزلهم حبل طويل


يربطوا فية الفراخ ...واشدة لفوق وخلاص...طبعا الفراخ دة بتاع وحدة ست شرانية خالص ساكنة


في الدور الارضي ....والفراخ بينط في المدرسة....اقتنعوا بعد عذاب ومناورات كتير...مني ومن


تامر....لفوا ونطوا من السور وكنت شرحتلهم هيعملوا اية بالظبط ...يخلوا الفراخ تمشي الاول ناحية


الركن البعيد الي هناك دة....وبعد كدة هجوم عليهم وامسك....هما نزلوا وانا وتامر ميتين من الضحك


فوق وكل ما يزيد الضحك انزل تحت في البلكونة علشان ميشوفونيش وتستمر...القصة مسكوا تلات


فرخات ....وجايين ماسكينهم ورا ظهرهم ومكممين افواهم ....علشان الكوكوووكاكي....صوتهم


يعني ...العيال ربطت الفراخ ولسة بيشاور...محمد ........اني اطلع بالحبل .... انا اخدت قرار اني اطلع


بية شوية اعلي منة علشان ميطولش الفراخ مرة تاني.....وعينكم ما تشوف الا النور....باعلي صوت


يا حرامية الفراخ......الحقوا بيسرقوا الفراخ.....تامر يسحب الحبل بالفراخ وانا اصرخ...والعيال


تتكعبل وتوقع ...ومش عارفين يعملوا اية....مسافة لغاية السور...الست الشرانية خرجت...وشافت


باقي الفراخ تحت مزعور....وهما بيجروا... وواحد بيقول حرامية فراخ.....الست فضلت تندة


علي رجالتها.... وهما كانوا علي السور... ووقعوا من برة من كتر الرجفة.....وطبعا الناس فضلت


تدور عليهم وهما فص ملح وداب.... مقدروش يرجعوا طبعا علي البيت....راحوا العتبة.........

....علشان يستخبوا وسط محلات الملابس..يمكن علشان هناك زحمة والله مشوار من حمامات القبة للعتبة علشان يستخبوا ...اية الجمال دة .. .احنا اخدنا الفراخ ودخلنا


علي المطبخ قلت لة انا عايز اسرع طبخة اتعملت ومش مهم ناكل حتي............ بس علشان يعرفوا اننا اكلنا


دة المطلوب ... وادبح الفراخ دي ..وجوة المطبخ كانت مهزلة بكل المقاييس الواحد مكانش حاسس بنفسة من كتر الضحك وبسرعة كانت الفراخ مية مية .تلات فراخات طبعا... وعملنا اكلة زي العسل..... علي فكرة استسمحنا


الست دي بعدين بسمن بلدي والذي منة علشان الحلال يعني ..لحسن تفتكروا اني مش كويس .المهم احنا خلصنا الطبيخ والعيال


مرجعتش.... اكلنا ومزيدا من الحسرة خلينا لهم تلات اجنحة منمنمين كدة وكل واحد كانة مخاصم التاني وكام واحد من القلوب الي جوة دي...محطوطين


بشكل يضحك في طبق....لا ومعملوهم سيرفس علي طريقة الفنادق الخمس نجوم
.علي الساعة 8 كدة هما رجعوا احنا طبعا ....كنا شبعنا ضحك اصلا


دخلوا.... ولسه هيتكلموا ويعتبوا علينا ...قلت لهم ...خلي بالك انت وهو من كلامك جوز الست دي


جالنا هنا وسأل عليكم ...ومعاة مطوة قرن غزال....زي الي بيمسكها اللمبي دي حاليا... وقتها مكانش فية لمبي الكلام دة من 14 سنة.....


كلامي كان يحمل نبرة تهديد.....المهم قالوا طيب فين الفراخ... قلت لهم فية حجات جوة ليكم


وهنا احنا وقفنا علي باب المطبخ ...علشان نشوف التعبيرات علي وشهم..... تلات جناحات وقلوب


يا قلبي عليهم...قال مفيش حد يقدر يعمل في مقلب قال .


ها ها هايييي

هناك 24 تعليقًا:

مجهول يقول...

ياخراااااااااااااااااااااابي
منك لله
حرامي فراخ
وانا بقول مين بياخد البيض من العشه
تطلع حرام فراخ
هههههههههه
جاااااااااااااااااامد يا عدووووول
ايه يا ابني انته حتقضيها افلام ولا ايه
بس مستني الجزء الجاي
بس يخرب بيتك انته بتسع ترواح
هههههههههههههههههههههههههههههه
قال تلات جوانح وقلوب
حرااااااااااامي حراااااااااااااامي
ههههه
لك تحياتي وفي انتظار الجاي بسرعه
انا التعليق الاول اهوه يا معلم
مش قلتلك محدش ياخد مكاني ابدا

كراكيب عادل يقول...

مجهول

فعلا محدش ياخد مكانك يا نباتي شوفت علشان تعرف قيمة البروتين بيخلي العيال تسرق فراخ.......العيال رضيت حتي بتلات جوانح وقلوب ....صدقني مفيش احلي من الهوبر

تحياتي

Ma-3lina يقول...

انت قلتلى انت كليه ايه ؟؟

اه هندسة هما بتوع هندسة دول فاضيين يا بنى دا انا اسمع عندكم مشاريع و كلام جامد

انت كنت هندسة انتساب و لا معهد هندسة

انت قسم ايه صحيح ؟؟
فراخ و طيور ههههه

بس مسخرة

مستنية بقية المقالب

smraa alnil يقول...

هههههههههههههههههه

لالالالالالالالالالالالالالا
انت اكيد واخد كورسات شر
ايه يا ابني المقالب دي
بس ايه النداله دي بقي
المقلب انك تستر علي اخوك
ههههههههههههههه
لا بس مقالب في الجون بجد
هستني بقي ومش تغيب زي المرة اللي فاتت

كراكيب عادل يقول...

ma-3lina

قسم تفريخ هههههههههه

وايه حكاية مسخرة دي هي لازمة عندك ولا اية بتضحكني الكلمة دي لان فعلا كل دة مسخرة مسخر مسخرة بجد

استني البقية تأتي

كراكيب عادل يقول...

smraa alnil

لا مهو الجريمة سقطت خلاص يعني ممكن اتكلم عنها اي اسرار ممكن تطلعيها بعد مرور 10 سنوات علي مسؤليتي مش بيعملوا كدة في السياسة برضو انا خلاص عدت 14 سنة دنا صبرت كتير لا هي موهبة في المقالب بتجي لوحدها

الغياب غصب عني ظروف الشغل

بس دايما في نهاية الاسبوع ممكن يكون فية حاجة خميس جمعة يعني

تحياتي يا سمراء

سلسبيل يقول...

يامقالبِك ياهولندا
انا بس عاوزة افهم..اصحابك اللي بتعمل فيهم كده....مالهمش كبير ف العيلة يشتكوك ليه طيب هههههههههههه.
طب مالهمش اي حد ينقذهم من تحت ايدك.
واللي مستغرباله انهم بيرجعو يصدقوك بعد كده.حتجنن واعرف بس بتقنعهم بعد كل العمايل دي ازاي

كراكيب عادل يقول...

سلسبيل

ليهم كبير مننا وفينا

بنرضيهم بعدها ونخليهم ينسوا وبعدها بيكون فية حاجة مختلفة بس بصراحة فية ناس اخدت مناعة بس برضو مفيش فايدة

هناك طرق اخري للمقالب


تحياتي

يا مراكبي يقول...

لأ بقى .. المره دي جامدة جدا جدا جدا

أنا مش عارف أصحابك دول إزاي صدقوك ونزلوا من أصله؟

نداء لكل المدونين .. حرصوا وإنتوا داخلين المدونة بتاعة المقالب دي

كراكيب عادل يقول...

مراكبي

مهو الموضوع لو مصدقوش مش هيكمل وفية حجات كتير متصدقتش بس فية حجات بتظبط

يا عم لية التحذير دة دنا غلبان


علشان كدة هنعمل استراحة ونريح من حكاوي المقالب شوية

تحياتي

غير معرف يقول...

سؤالي هما اكلوا الجناحات ولا لا

بس حلوة

هههههههههههههههههههههههههههههه

khaled يقول...

الحرامى اهه هه
الحرامى اهه هه
الحرامى اهه هه

كراكيب عادل يقول...

Anonymous

لا رموهم في الزبالة علطول وعملوا شاي


بس منظرهم كان تحفة

كراكيب عادل يقول...

khaled


يا عم القضية خلاص سقطت

انت هتفضحنا وسط المدونين والمدونات ولا اية



تحياتي

شيماء الجيزى يقول...

والله يا عم عادل معارفه اقول ايه
دى جريمه لو كانت حصلت دلوات كان حصلك بلاوى
على الاقل كان جالك انفلونزا الطيور
بس انت عديت منها يا لئيم
:d

ماشى ماشى
حسبى الله ونعم الوكيل
هستنى الباقى غصب عنى
عشان اضحك شويه :d

الأباصيرى يقول...

هههههه
ياجامد يابتاع الطيور أنت

ربنا يكرمك وتقع فى مقلب حلو كدة


انا من ساعة ماجيت الكويت وأنا بطلت مقالب..توبنا إلى الله

كراكيب عادل يقول...

اباصيري

انا بحاول اني مبطلش بس الظاهر بكتابة المواقف دي هتكون خلاص



انامعتقدش تبطل فقر

R2K يقول...

: )

كراكيب عادل يقول...

r2k


:)

أميرة ويلز يقول...

هههههههههههههههههه



حلوة حرامى الفراخ دى



كويس انك عوضت الست


احسن كنت هقولك تقبلهم على عينك وعافيتك



انا بجد صعبوا عليا يعنى يبقى فى فراخ فى البيت وتطبخ وتتاكل وكمان فى الغربة والغلب

ومش بس كدة هما اللى تعبوا فيها دة انت مفترى

كراكيب عادل يقول...

الاميرة

هي حلاوتها في كدة


انتي محلتيش التمرين لية ولا علشان اميرة يعني


تحياتي

الأباصيرى يقول...

لأ .. متخافش

الفقر دة حظ ملازمنى من يوم ما اتولدت
وبتحط فى مواقف بايييييييخة

مش انا مرة كن هتمسك فى المطار
التفاصيل فى البوست القادم
يوم السبت

كراكيب عادل يقول...

اباصيري

اهم حاجة تطلع من المواقف دي بحاجة تتحكي وتضحك علي الاقل



منتظرين يوم السبت انا عندي لسة بلاوي بس الوقت مشكلة

arab girlscool يقول...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول